三催四請之下,終於完成第4日遊記了...
因為我答應左係426婚禮上忍辱負重既hello kitty男要完成佢的XDDD
不過最奇異既就係明明冇份去既nuts朋友都成日催我...
到底佢地真係想睇,定為催而催架呢~_~


DAY4

今日既行程並不緊迫,不過都唔算晏起身...
證據係我地今日有係酒店食埋早餐XD
雖然D食物都係同前幾日差不多...
似乎大家都未訓醒...
得淇哥有影低是日既早餐情況
 

今日既特別安排只係女團員下晝有SPA既環節
其實酒店出面係有個巴東海灘的,我地DAY1夜晚既時候都有行過
所謂近水樓台,冇奶油唔趁日抖再去下架
不過更加近水樓台既就係酒店都有泳池,所以大家出沙灘之前就係酒店泳池度HEA陣先
(講起上黎DAY3潛完水之後冇記錯都有係酒店泳池游左陣的!不過我漏左寫...-_-)


酒店泳池...其實都冇咩特別XDD
左 - 唔駛諗,一大班人去有露台既酒店,總有條友行左出露台之後比人反鎖度門A_A
中 - 酒店游池一攝,男技師淇既特別服務
右 - 係酒店泳池既上方,我覺得自己影得幾靚,嘿嘿...之前有用過黎做XANGA背景的


HEA左一陣  ,大家動身去巴東海灘了
其實真係行幾步就到

個海灘似乎比係蛋島較遜,因為冇咩魚,水亦冇咁清
不過對於我呢個連香港海灘都少去既人黎講,已經覺得好好...
其實可能同天氣有關啦,香港有咁晴朗既天氣似乎不多
就算撞岩有,果時我都應該係公司入面...
藍天白雲之下,心情都會愉快得多


左 - 我又出賣肥暈了...m(_ _)m
右 - 出自淇哥手筆,子下嬌俏,小強夠型...正

大約1點零我地就番酒店LOBBY,因為施太會過黎接我同子下去做SPA
話說...我唔記得左間SPA叫咩名...
泰國咁大,有D SPA當然唔似平時大家香港果D咁的骰
但都比我想像中大好多,成間酒店咁
(係我見識少T_T)

師太帶我地2個入去之後,就有位姐姐帶我地入去一個廳到,比4種香味我地揀,係做按摩時既材料
老實講我覺得4隻差不多...都係清清地咁啦
 

然後姐姐就帶我地去入SAUNA房焗一陣...都係平時D SAUNA咁
SAUNA房隔離有個按摩浴池,SAUNA完後我地就可以直接行過去浸一陣
其實感覺上同泳池差不多...不過有多幾個出水既位咁解
水亦比係冰池冰涼,大概取其焗完後快速收緊既效果...我都冇咩研究= =

都係浸左10分鐘左右就有姐姐帶我地去換浴袍,拖鞋
再經佢帶領之下(我記得條路好似幾迂迴曲折~_~)
入去一間幾大既房,我地就係果度做SPA了
間房係左右兩端各有一個木制浴盤,中間有兩張床
做SPA之前先浸個牛奶香花浴~~~
哎...最衰我一入去擺野果陣賴低左個相機係LOCKER...影唔到個浴缸同埋子下美人出浴...
呢件事係我成個行程最遺憾既事之一...
實情個浴缸真係奶白色既水,加大量鮮花同香草之類,所以浸左落去都冇野比人睇到既XD
雖然唔知入面係咪真係有牛奶,唔通真係走去飲下咩XD
假如有人問有冇奶味,我只可以話草青同花味比較強勁...
剛才提到間房係有2個浴盆,但由於係一左一右既側邊,加上間房幾大
所以係各自浸浴既30分鐘,我地吹水都吹得幾辛苦XDDD

到咁上下就有技師黎幫我地按摩
就係用番一開始入黎揀果隻味既野
我都唔係好記得按既過程,我諗都算按得舒服既
因為我中途訓著左了=_=
又可能連日有d累既關係...

按好後換衫沖身,出番去大廳仲有茶點招呼添

諗諗下其實我同子下果日係冇食lunch@@

小歇一下我地就行番出門口等師太車男團員過黎會合
等既期間總算可以影下間野
其實我都幾鍾意間SPA既裝潢
亭台樓閣,盎然綠意,加上伴隨陣陣涼風既夕陽
兼按完摩,爽晒~


在此補充一下,女士們享受SPA之際,布吉團風塵三俠又有咩活動呢?
根據佢地所講係由於兩次叫唔到room service既怨念
今次總算可以一嘗酒店既食物...睇落幾好食,但份量對佢地好似少左d

而聽聞酒店有提供按摩既服務
佢地本來想試下(想按邊度就佢地先知XD)
後來都係失敗而回,唔記得咩原因了
失落既佢地最後係巴東海灘同酒店悠閒地hea左一日

人齊我地就坐師太架車去食晚餐
話說...雖然有相為據,但我又點會識打間野個名...
不過據聞間野食海鮮既係幾出名的
所以都係一早安排好既地點
   
餐廳係大型室外的,有涼亭位亦有露天位,旁邊有個不知名既海灘
我地就坐係海灘隔離既露天位置
入夜海灘只有小船零星
除左有見到「力挽狂瀾」,仲有小貓一隻添


團員們好體貼咁叫左D好野比我呢個唔多食魚以外海鮮既茂利...
真係有D唔好意思...有個送超好食的,仲有ENCORE過
冇記錯好似係蝦餅...仲有賣相超吸引既龍蝦~雖然我冇食XD


之前提過,是次旅程大家好鍾意有事冇事扮茶餐廳入面張貼既李連杰/曾志偉啤酒廣告...
可惜搵唔到張原圖,睇下各位個樣都好誠懇XDDDD
其中又以肥暈扮得最神似,呵呵
淇哥果張個樣好似想食人咁o口o


睇番d相醒起有人叫左個雪榚椰青,當時我冇叫,而家睇番又好似幾好味咁
外加土瓜灣twins...呀,我諗叫solar會好d...表情有D姣= =


飲飽之後就要食醉,一行人再續尋日未完既巴東夜蒲之旅
聽日就番去了,因此沿路亦不忘張羅一下手信,去到手信店大家都稍有斬獲
我買左D鎖匙扣...係行左D,不過都幾靚架
淇哥就買左隻貝殼船比屋企人,見佢一路行一路睇住撞親隻船,真係辛苦了
我仲係夜市度買左條手鍊比同事,事後比人問我做咩唔講價@@
其實去完呢個trip之後我發覺我地隊中既男士比女士係更擅長講價...
因為每次講價(搭篤篤,買野等)都係淇哥等人出手-_-

另外有關手信,就係係夜市我地見到一件有趣既t-shirt
印住"good guys go to heaven,bad guys go to patong"
經過淇哥一番唇槍舌劍(即係講價),買左比甩底既文西做手信
團員們亦有買黎自用,而我就興趣缺缺,因為我知我唔會著的XDD
(岩岩有人話我聽,佢直到而家連個袋都未拆 ; 亦有人話著過,感覺良好)
我地又見到有人隨街兜售一個好有成人趣味既玩具...
本來呢個都係文西手信既考慮之列XDD
有點露骨,就係一pat疑似男性器官既物體,半隻手掌大左右啦
一撻佢落d平面到佢就會慢慢勃起...@口@
最後因為講價不成而冇買了

行行下我地就自然地被呢間bar既招牌吸引
   
基於對某賀姓友人既情意結,我地就坐低左了
入而面仲有disco添,不過我地呢d好孩子就梗係係出面飲下椰青算啦


但原來個椰青係alcoholic...我唔記得叫咩名了
其實係叫團員介紹一下佢地就幫我叫左呢個
肥丸曰此為導女飲品也,因為易入口云云
冇酒味的,岩晒我XD

打左陣躉我地周圍行下準備再戰一round

鯊魚bar又令人聯想起某人XD不過由於入面既感覺太邪惡(?),所以就冇入去了

  
左 - 某間bar既門口側面,大張血盤之口既虎頭本應好有氣勢,但加埋成堆垃圾實在有點滑稽,好似食到嘔咁=_=
(遊客區就係咁,要保持企理還是有點難度...唉)
右-入鄉隨俗既老麥叔叔,可惜我地全程都冇試過泰國既m記

後來又隨便係一間bar到坐低左

相影得唔清楚,但兩杯sex on the beach既杯係一個玲瓏浮凸既女性身體A_A
不過杯野好難飲,勁大陣藥水味x_x
我記得平時係香港飲係橙汁黎架...相中仲有淇哥係手信店既戰利品

值得一提既本身間bar後面兩層都係波樓,仲有好多顧客有女女傍住...
記得佢個廁所係樓上,我同子下去等廁所果陣仲比我見到樓上波樓既情況更香艷...@@
(其實都係上下其手咁啦...哎,非禮勿視,我都懶得昅了)
怪唔知出面bar冇咩人,我諗呢度都係黎篤波,定唔知想篤d咩既尋芳客XDD
但其實果d女係咪都係人妖黎架呢...???真係不得而知了

飲左兩間,見時候都不早就番去了
行番出大街截車既途中發現一家即做漢堡既車仔檔
男士們似乎已經完全消化左晚餐既野,二話不說就幫襯左,盛惠50b一個,又幾抵食
(其實係睇相先記得幾$)

個老板仲特登擺好pose比我地影相XD
其實見到佢整真係好鬼吸引,果時都好想買番個黎食,不過飲完酒成肚水好滯
番到酒店,男團員們大快朵頤,仲特登打黎話好好食,我頂....
呢個成為我是次旅程既第二個遺憾T_T